రచన : దాశరథి
సంగీతం : సాలూరి రాజేశ్వరరావు
గానం : పి.సుశీల
పల్లవి :అందెను నేడే అందని జాబిల్లి
నా అందాలన్నీ ఆతని వెన్నెలలే
అందెను నేడే అందని జాబిల్లి
చరణం : 1
ఇన్నేళ్ళకు విరిసె వసంతములు
ఇన్నాళ్ళకు నవ్వెను మల్లియలు
నిదురించిన ఆశలు చిగురించెలే (2)
చెలికాడే నాలో తలపులు రేపెనులే
అందెను నేడే అందని జాబిల్లి
చరణం : 2
నా చెక్కిలి మెల్లగ మీటగనే
నరనరముల వీణలు మ్రోగినవి
గిలిగింతల నా మేను పులకించెలే (2)
నెలరాజే నాతో సరసములాడెనులే
అందెను నేడే అందని జాబిల్లి
చరణం : 3
ఇక రాలవు కన్నుల ముత్యములు
ఇక వాడవు తోటల కుసుమములు
వినువీధిని నామది విహరించెలే (2)
వలరాజే నాలో వలపులు చిలికెనులే ॥
